روٹھے ہو یا جوگ لیا ہے

روٹھے ہو یا جوگ لیا ہے ،کیوں ہو یوں بےزار پیا جی
پائل میری کچھ کہتی ہے ،سن تو لو اک بار پیا جی

اوس کی بوند میں دریا پالوں،میں جنموں کی پیاس بجھا لوں
سوکھ نہ جائے تن من میرا دیکھو نا اک بار پیا جی

گم صم،چپ چپ کیوں بیٹھے ہو،ساون کے اس موسم میں تم
سنگ بیٹھا کر مجھ کو اپنے ، چھیڑو نا ملہار پیا جی

کیسا جھمکا کیسا کاجل، نینا ہی جب روٹھ گئے ہوں
بھائے نہ مورے من کو اک چھن، یہ سولہ سنگار پیا جی

گھپ اندھیارا جھم جھم بارش، دور تلک پھیلا سناٹا
آنے کے دکھتے ہی نہیں کچھ، تیرے اب آثار پیا جی

سونا سونا گھر دروازہ، من مندر میں گھور اندھیارا
ایسے عالم میں جینا بھی،کتنا ہے دشوار پیا جی

بوجھ اکیلے ڈھو لیتے ہیں، چپکے چپکے رو لیتے ہیں
اونچے نیچے یہ جیون پتھ، ہوں کیسے ہموار پیا جی

تم سے تمرا اہم نہ ٹوٹا، آن پڑی مجھ پر سب بپتا
میں ہی ٹوٹی، میں ہی بکھری، جانے کتنی بار پیا جی

ہوک اٹھتی ہے رومی اکثر، میں نے آخر کیا پایا ہے
آہیں ، آنسو اور کتابیں ، ہیں میرا سنسار پیا جی

رومی ملک

اشعار مرے یوں تو زمانے کے لیئے ہیں

اشعار مرے یوں تو زمانے کے لیئے ہیں​
کچھ شعر فقط ان کو سنانے کے لیئے ہیں​
​
اب یہ بھی نہیں ٹھیک کہ ہر درد مٹا دیں​
کچھ درد کلیجے سے لگانے کے لیئے ہیں​
​
آنکھوں میں جو بھر لو گے تو کانٹے سے چبھیں گے​
یہ خواب تو پلکوں پہ سجانے کے لیئے ہیں​
​
دیکھوں ترے ہاتھوں کو تو لگتا ہے ترے ہاتھ​
مندر میں فقط دیپ جلانے کے لیئے ہیں​
​
یہ علم کا سودا‘ یہ رسالے‘ یہ کتابیں​
اک شخص کی یادوں کو بھلانے کے لیئے ہیں​

میں نظر سے پی رہا ہوں یہ سماں بدل نہ جائے

میں نظر سے پی رہا ہوں یہ سماں بدل نہ جائے
نہ جھکاؤ تم نگاہیں کہیں رات ڈھل نہ جائے

مرے اشک بھی ہیں اس میں یہ شراب ابل نہ جائے
مرا جام چھونے والے ترا ہاتھ جل نہ جائے

ابھی رات کچھ ہے باقی نہ اٹھا نقاب ساقی
ترا رند گرتے گرتے کہیں پھر سنبھل نہ جائے

مری زندگی کے مالک مرے دل پہ ہاتھ رکھنا
ترے آنے کی خوشی میں مرا دم نکل نہ جائے

مجھے پھونکنے سے پہلے مرا دل نکال لینا
یہ کسی کی ہے امانت مرے ساتھ جل نہ جائے

انور مرزاپوری

تہمتِ چند اپنے ذمّے دھر چلے

تہمتِ چند اپنے ذمّے دھر چلے

کس لئے آئے تھے ہم کیا کر چلے

زندگی ہے یا کوئی طوفان ہے

ہم تو اس جینے کے ہاتھوں مر چلے

کیا ہمیں کام ان گلوں سے اے صبا

ایک دم آئے اِدھر اُدھر چلے

دوستو دیکھا تماشا یاں کا بس

تم رہو اب ہم تو اپنے گھر چلے

شمع کے مانند ہم اس بزم میں

چشمِ تر آئے تھے دامن تر چلے

آہ بس جی مت جلا تب جانیے

جب کوئی افسوں ترا اس پر چلے

ایک میں دل ‌ریش ہوں ویسا ہی دوست

زخم کتنوں کے سنا ہے بھر چلے

ہم جہاں میں آئے تھے تنہا ولے

ساتھ اپنے اب اسے لے‌کر چلے

ڈھونڈتے ہیں آپ سے اُس کو پرے

شیخ صاحب چھوڑ گھر باہر چلے

ہم نہ جانے پائے باہر آپ سے

وہ ہی آڑے آ گیا جیدھر چلے

جوں شرارِ ہستئ بے بود یاں

بارے ہم بھی اپنی باری بھر چلے

ساقیا یاں لگ رہا ہے چل چلاؤ

جب تلک بس چل سکے ساغر چلے

درد کچھ معلوم ہے یہ لوگ سب

کس طرف سے آئے تھے کیدھر چلے

میردرد

کہیں تم اپنی قسمت کا لکھا تبدیل کرلیتے

کہیں تم اپنی قسمت کا لکھا تبدیل کرلیتے
تو شاید ہم بھی اپنا فیصلہ تبدیل کرلیتے
اگر ہم واقعی کم حوصلہ ہوتے محبت میں
مرض بڑھنے سے پہلے ہی دوا تبدیل کرلیتے
تمہارے ساتھ چلنے پر جو دل راضی نہیں ہوتا
بہت پہلے ہم اپنا فیصلہ تبدیل کرلیتے
تمہیں ان موسموں کی کیا خبر ملتی اگر ہم بھی
گھٹن کے خوف سے آب و ہَوا تبدیل کرلیتے
تمہاری طرح جینے کا ہنر آتا تو پھر شاید
مکان اپنا وہی رکھتے، پتا تبدیل کرلیتے
وہی کردار ہیں تازہ کہانی میں جو پہلے بھی
کبھی چہرہ، کبھی اپنی قُبا تبدیل کرلیتے
جُدائی بھی نہ ہوتی زندگی بھی سہل ہوجاتی
جو ہم اک دوسرے سے مسئلہ تبدیل کرلیتے
ہمیشہ کی طرح اس بار بھی ہم بول اُٹھے ورنہ
گواہی دینے والے واقعہ تبدیل کرلیتے
بہت دھندلا گیا یادوں کی رم جھم میں دلِ سادہ
وہ مل جاتا تو ہم یہ آئینہ تبدیل کرلیتے

سوچتا ہوں یونہی کبھی کبھی

سوچتا ہوں یونہی کبھی کبھی
گر وہ مل جاتا تو کیا حرج تھا

سانس در سانس جی رہا ہوں اسے

سانس در سانس  جی رہا ہوں  اسے
وہ جو آنکھوں کی دسترس میں نہیں

میرے رشکِ قمر تو نے پہلی نظر

میرے رشکِ قمر تو نے پہلی نظر، جب نظر سے ملائی مزہ آ گیا
برق سی گر گئی، کام ہی کر گئی، آگ ایسی لگائی مزہ آ گیا

جام میں گھول کر حسن کی مستیاں، چاندنی مسکرائی مزہ آ گیا
چاند کے سائے میں اے میرے ساقیا، تو نے ایسی پلائی مزہ آ گیا

نشہ شیشے میں انگڑائی لینے لگا، بزمِ رنداں میں ساغر کھنکنے لگے
میکدے پہ برسنے لگیں مستیاں، جب گھٹا گھر کے چھائی مزہ آ گیا

بےحجبانہ وہ سامنے آ گئے، اور جوانی جوانی سے ٹکرا گئی
آنکھ اُن کی لڑی یوں میری آنکھ سے، دیکھ کر یہ لڑائی مزہ آ گیا

آنکھ میں تھی حیاہ ہر ملاقات پر، سرخ عارض ہوئے وصل کی بات پر
اُس نے شرما کے میرے سوالات پہ، ایسے گردن جھکائی مزہ آ گیا

شیخ صاحب کا ایمان مٹ ہی گیا، دیکھ کر حسنِ ساقی پگھل ہی گیا
آج سے پہلے یہ کتنے مغرور تھے، لٹ گئی پارسائی مزہ آ گیا

اے فناؔ شکر ہے آج بعدِ فنا، اُس نے رکھلی میرے پیار کی آبرو
اپنے ہاتھوں سے اُس نے میری قبر پر، چادرِ گل چڑھائی مزہ آ گیا