Ghazlon men tery ishq ka...

ghazlon men tery ishq ka churcha na karengy.
hum tujh ko yun sur-e-aam ruswa na karengy.

kiyon hum pe uthaeen sung-e-malamut ki faseeleN,
behter he tery sheher men hum aaya na karengy.

ye chaand ye taary ye haseen raat ka aalum,
munsoob tery naam se kiya kiya na karengy.

weeran hoey qasr-e-tamana ke dareechy,
aabad kabhi piyar ki ab dunya na karengy.

har cheez ki bohtaat mein nuqsaan boht he,
shiddat se kisi shakhs ko chaha na karengy.